По повеќе од една година граничниот премин „Евзони“ од денеска се отвора. Сите државјани на Македонија кои сакаат да влезат во Грција ќе треба да приложат негативен ПЦР-тест, писмен доказ за пимени две дози вакцини против ковид или позитивен резултат за антитела.

Оваа информација вчера на својот „Фејсбук“ профил ја потврди и премиерот Зоран Заев, кој во Атина учествуваше на Економскиот форим Делфи, каде се сретна со грчкиот премиер Кирјакос Мицотакис.

Засега на ГП „Богородица“ е тивко, но се очекува дека голем број на граѓани ќе ја искористат можноста да заминат на море за продолжениот викенд. Овој граничен премин најчесто го користат и граѓаните на Србија кои патуваат на летување преку Македонија.

Границите на Грција веќе една година се затворени за државјани на трети земји, меѓу кои и за македонските државјани. Одлуката беше воведена лани, за време на првиот карантин во март, а оттогаш се продолжува на секои две седмици. Прекуграничните поминувања беа само за одредени категории граѓани.