Државата започна да му го исплаќа на Град Скопје сопственичкиот удел во А1 Арена „Борис Трајковски “ Скопје, откако на крајот на април Министерството за финансии ги префрлило првите 60 милиони денари на сметката на центарот.

Градските власти интензивно започнаа да ги бараат овие пари уште пред три години додека министер за финансии беше Драган Тевдовски по основ на сопственичкиот удел на Градот во спортскиот комплекс, кој од градска сопственост премина под државна капа.

Поранешната власт пред 13 години се задолжи околу 4 милиони евра кај Град Скопје, а до сега пет пати бил потпишуван анекс на договор. Скопскиот градоначалник Петре Шилегов бараше долгот да биде вратен неколкукратно, по една рата годишно.

Александар Петровски, директорот на А1 Арена „Борис Трајковски“, вели дека парите штом центарот ги добил од Министерството за финансии веднаш ги наменил за исплата кон Град Скопје.

– Првата рата од милион евра требаше да се исплати конечно минатата година но поради ситуацијата со пандемијата наидовме на разбирање од градоначалникот Петре Шилегов, така што може да се смета дека оваа е првата. Останатите три ќе следуваат во наредните години, така што во последната рата ќе биде вклучен и остатокот кој ги надминува овие 4 милиони вера. Тоа се пари кои секако ќе бидат добредојдени како помош за градот, вели Петровски.

СРЦ „Борис Трајковски“ почна да се гради на почетокот на 2004 година, со пари од градскиот буџет, во времето на градоначалникот Ристо Пенов. Требаше да се реализира за една година, но плановите не се остварија. Започнатиот проект го продолжи градоначалникот Трифун Костовски. Во негово време Град Скопје и Владата потпишаа договор за примопредавање на салата.

Беше формирано заедничко друштво „Борис Трајковски“ кое раководеше со објектот, а секој од инвеститорите доби соодветен број акции во него, според парите што ги вложил. Откако објектот премина под државна капа, Владата се обврза да му плати отштета на Град Скопје за уделот што локалната власт го имала во изградбата.