По официјалните средби со европските лидери и високи претставници на Европската комисија и Европскиот парламент, премиерот Зоран Заев во видеообраќање од Брисел порача дека добил поддршка и разбирање дека Северна Македонија не сака да преговара за идентитетот и јазикот.

„Сите европски лидери и претставници ја знаат и ја разбираат нашата позиција – додека некој се обидува, а гледаме дека се обидува, македонскиот јазик и македонскиот идентитет да ги стави на европската маса за преговори, ние нема да преговараме. Порачавме јасно и гласно и повторивме – тргнете ја секоја дискусија за македонскиот јазик и македонскиот идентитет од масата за разговори во Брисел – после тоа можеме да продолжиме да разговараме за нашата европска иднина“, изјави Заев.