Поштенски пратки за Кина нема да се праќа, но тие што доаѓа ќе се примаат

Четврток, 13 Февруари 2020 12:13 Напишано од  Објавено во МАКЕДОНИЈА

Испраќање на поштенски пратки од нашата земја кон примачи на подрачје на Кина, нема да се врши во наредниот период поради привременета забрана за летови кон и од Кина што ја воведоа авиокомпаниите како резултат на ширењето на коронавирусот, информираат од Пошта на РСМ.

Оттаму истакнуваат дека пратките од Народна Република Кина кои сѐ уште пристигнуваат се доставуваат според вообичаената динамика.

– Поради ширењето на корона вирусот во Народна Република Кина, авиокомпаниите кои покрај превозот на патници вршат и транспорт на поштенски пратки за Кина, имаат воспоставено привремена забрана за летовите кон и од Кина. Заради тоа, испраќање на поштенски пратки од нашата земја кон примачи на подрачје на Кина, нема да се врши во наредниот период – објави Поштата на својата веб страница.

Националниот поштенски оператор ги замолува корисниците за разбирање и најавува дека навреме ќе извести за сите промени.

Претходно, дел од националните поштенски оператори во регионот, информираа дека престануваат да испорачуваат пратки од Кина, поради прекинатите летови од страна на авиокомпаниите.

Светската здравствена организација на почетокот на месецов соопшти дека примачите на пратки и писма од Кина не се изложени на ризик од зараза од коронавирус.

– Според последните анализи вирусот не живее долго на површината на предметите, како што се писма или пакети – објави СЗО.

Последен пат изменето на Четврток, 13 Февруари 2020 12:18