БДП порасна, но не колку што очекувал Заев

Петок, 06 Декември 2019 14:48 Напишано од  Објавено во НОВИНИ

Домашниот бруто производ во третиот квартал годинава бележи раст од 3,6 отсто, објави Државниот завод за статистика.

Најголем пораст во третото тримесечие е забележан во секторите „рударство и вадење на камен“, „преработувачка индустрија“, „снабдување со електрична енергија, гас, пареа и климатизација“, „снабдување со вода, отстранување на отпадни води, управување со отпад“ и дејности за „санација на околината“ од 6,8 отсто, „градежништво“ од 5,5 отсто и „трговија на големо и трговија на мало“, „поправка на моторни возила и мотоцикли, транспорт и складирање“, „објекти за сместување и сервисни дејности со храна“ од 4,9 отсто.

Финалната потрошувачка на домаќинствата вклучувајќи ги непрофитните институции што им служат на домаќинствата, во третото тримесечје од 2019 година, номинално растеа за 4,6 отсто, а нејзиното учество во структурата на бруто домашниот производ изнесува 65,6 отсто.

Во истиот период, извозот на стоки и на услуги номинално се зголеми за 8,4 отсто, а увозот на стоки и на услуги забележа зголемување во номинален износ од 10,9 отсто.

Растот на БДП во првиот квартал изнесуваше 3,9 отсто, а во вториот 3,4 отсто.

Ваквиот раст на БДП, според премиерот Зоран Заев, е под она што тој го очекувал, бидејќи дел до секторите потфрлиле.Тој се надева дека четвртиот квартал ќе биде подобар и прогнозата за годинава ќе се оствари.

- Можеме да сме задоволни, но не до крај – рече Заев на денешната промоција на проектот за поставување фотоволтаици на јавни објекти.

Последен пат изменето на Петок, 06 Декември 2019 14:58