Минов: Оптимист сум дека Владата ќе има волја позитивно да се реши проблемот на лозарите

Среда, 30 Јануари 2019 14:27 Напишано од  Објавено во МАКЕДОНИЈА

 Оптимист сум дека Владата ќе има волја позитивно да се реши проблемот на лозарите, рече денеска на прес конференција пратеникот Панчо Минов од Кавадарци. Тој нагласи дека има правен основ за исплата на долгот на лозарите од винарските визби за грозје купено во 2014, 2015 и 2016 година.

– Поставив пратеничко прашање до премиерот и министерот за земјоделство и веќе по направените анализи утврдив дека имало случај за друга категорија на земјоделци, кога државата платила со пари од буџетот. Правниот основ е во законот за земјоделство и рурален развој. Во пратеничкото прашање посочив дека ваква пракса на спроведување на овој правен основ од законот веќе еднаш е реализирана за друга категорија на земјоделци. Испитав и во Агенцијата за финансирање на земјоделците, да во масата на средства која што е превидена во 2019 вкупно за земјоделството е предвидено и дел на средства за разрешување на овој најголем проблем на лозарите од Тиквешијата, додаде пратеникот.

Соопшти дека во неговото писмено прашање се интересирал и за исплатата на субвенции за лозарите, како и за ветениот денар по килограм грозје продадено во винарските визби.

– Очекувам и ги охрабрувам лозарите дека овие поставени прашања и ова мое застапување ќе продолжи се до решавање на проблемот, а јас сум оптимист дека одлуката ќе биде соопштена за денот на лозарите и за исплата на редовните субвенции пред празникот Свети Трифун, заедно со едниот денар, нагласи Минов.